Mga residenteng tutol sa UP SDG Park nakipag-ugnayan sa UN expert on business, human rights

[ENGLISH] Residents opposing UP SDG Park engages UN expert on business, human rights

Bilang bahagi ng kanyang academic mission sa Pilipinas, nakipag-ugnayan si Dr. Pichamon Yeophantong, miyembro ng United Nations Working Group on Business and Human Rights (UNWGBHR) para sa Asya-Pasipiko, sa mga residente ng Pook Malantic, Barangay UP Campus, Quezon City noong Agosto 13, 2026.

Isa ang Pook Malantic sa mga komunidad na direktang maaapektuhan ng University of the Philippines (UP) Sustainable Development Goals (SDG) Park. Bagama’t inilalarawan ang proyekto bilang pangunahing hakbang para sa “sustainable development,” mariing tinutulan ito ng mga residente at mga organisasyong pang‑masa, na nagbabala laban sa malawakang demolisyon, pagkawala ng kabuhayan, at pagbuwag sa matagal nang mga pamayanan.

• 

• 

Bago ang kanyang pagbisita sa Pook Malantic, nakipagtalakayan si Dr. Yeophantong sa mga residente at lider ng Samahan ng mga Nagkakaisang Komunidad (SAMANAKO) sa UP sa roundtable na inorganisa ng Panaghiusa Philippine Network to Uphold Indigenous Peoples’ Rights (Panaghiusa) at KATRIBU Kalipunan ng Katutubong Mamamayan ng Pilipinas. Binigyang‑diin ng SAMANAKO sa UP na ang mga lupang tinatarget para sa SDG Park ay may makasaysayang kahalagahan, matagal nang binungkal ng mga magsasaka bago pa man maitayo ang Quezon City at ang UP Diliman, at patuloy na nagsisilbing espasyo para sa tirahan, kabuhayan, at pagkatuto ng komunidad. Matagal nang nakikipag‑ugnayan ang mga estudyante at guro ng UP sa mga komunidad na ito bilang mga “living classrooms,” kaya’t lalong malalim ang magiging epekto ng proyekto.

• 

• 

Dagdag ng SAMANAKO sa UP, mahigit 90,000 pamilya mula sa Pook Malantic, Pook Aguinaldo, Area 17, mga sakahan sa Krus na Ligas, CP Garcia, at Pook Arboretum ang posibleng maapektuhan. Sinusuportahan ng Panaghiusa ang panawagan ng mga komunidad para sa transparent na negosasyon, pagsuspinde sa implementasyon ng UP SDG Park, pag-pullout ng mga armadong guwardiya, pagtigil sa harassment at intimidasyon laban sa mga residente, at pagkilala sa karapatan sa lupa ng mga maaapektuhan.

• 

• 

• 

• 

Higit pa sa mandato nitong ipagtanggol ang karapatan ng mga Katutubo, binibigyang‑diin ng Panaghiusa na ang mga negosyo at malalaking proyekto sa kaunlaran ay may malalim na epekto rin sa karapatang pantao ng mga maralitang lungsod at magsasaka. Sa pamamagitan ng pag‑facilitate sa pagbisita ni Dr. Yeophantong, tiniyak ng Panaghiusa na ang mga hinaing ng Pook Malantic at mga karatig na lugar ay mapalakas sa pambansa at pandaigdigang entablado.

• 

• 

• 

• 

Sa pamamagitan ng pakikipag‑ugnayang ito, binibigyang‑diin ng Panaghiusa na ang pagtutol sa UP SDG Park, na kahalintulad ng pakikibaka ng mga Katutubo para sa lupa, buhay, at karapatan, ay isa ring pakikibaka para sa katarungan, dignidad, at karapatan sa tunay na makatarungan at pangmatagalang kaunlaran. Isang kaunlarang kumikilala sa makasaysayang kahalagahan ng lupa, nagpoprotekta sa kabuhayan, at nagtataguyod sa karapatan ng mga inaaping komunidad. #