Panaghiusa sinusuportahan ang panawagan ng mga komunidad sa Smokey Mountain laban sa waste-to-energy project
- Panaghiusa Philippine Network
- 16 hours ago
- 2 min read
Ang Panaghiusa Philippine Network to Uphold Indigenous Peoples’ Rights (Panaghiusa) ay nakikiisa sa mga residente ng Smokey Mountain, Barangay 128, Tondo, Maynila, sa kanilang pagtutol sa planong 100‑megawatt Waste‑to‑Energy (WTE) incinerator.
Ang mapanirang proyektong ito, na itinutulak ng pamahalaan at mga korporasyon, ay nagbabanta na palayasin ang mahigit 55,000 residente ng Smokey Mountain at mga karatig‑komunidad, wasakin ang kabuhayan, sirain ang mga taniman at maliliit na negosyo, at ilantad ang mga pamilya sa nakalalasong usok na banta sa kalusugan at kapaligiran. Taliwas ito sa diwa ng Clean Air Act at Ecological Solid Waste Management Act.
Noong Agosto 13, 2026, nag-facilitate ang Panaghiusa ng community visit ni Dr. Pichamon Yeophantong, miyembro ng United Nations Working Group on Business and Human Rights para sa Asya-Pasipiko, sa Smokey Mountain, Tondo, Maynila. Bahagi ito ng kanyang academic visit sa Pilipinas, kasunod ng pagbisita nila ni dating UN Special Rapporteur on the Rights of Indigenous Peoples Francisco Cali Tzay noong 2024 na nagsuri sa epekto ng mga negosyo sa mga Katutubo at iba pang inaaping sektor.
Sa Smokey Mountain, ibinahagi ng mga kasapi ng Samahang Magkakapitbahay sa Upper Smokey Mountain – KADAMAY kung paanong lalo pang pinapalala ng WTE project ang banta sa seguridad sa pabahay, kabuhayan, at kalusugan, habang winawasak ang mga proteksiyon sa kapaligiran. Binibigyang‑diin ng kanilang mga testimonya ang tunay na halaga ng buhay na isinasakripisyo para sa tubo. Kasabay nito, ipinakita ng mga komunidad ang kanilang patuloy na ambag sa pangangalaga ng kapaligiran sa Metro Manila sa pamamagitan ng urban gardening na nagbibigay ng seguridad sa pagkain, at sa sama‑samang pagtutol sa pagputol ng halos 1,000 puno sa kanilang lugar. Ang mga gawaing ito ay hindi lamang nagpapanatili ng kabuhayan kundi nagpapalakas din ng kakayahan ng kalikasan na labanan ang polusyon at pagbaha.
Sa Pilipinas, parehong mga maralitang lungsod at mga Katutubo ang nakararanas ng sapilitang pagpapalayas, pagkasira ng kapaligiran, at paglabag sa kanilang mga karapatan kapag ipinapataw ang tinatawag na “development projects” nang walang tunay na konsultasyon o pahintulot. Kung paanong ipinaglalaban ng mga Katutubo ang kanilang mga karapatan sa lupang ninuno at sariling pagpapasya, gayon din ipinaglalaban ng mga taga‑Smokey Mountain at karatig‑komunidad ang kanilang karapatang manatili sa kanilang tahanan at ipagtanggol ang kanilang kabuhayan, kalusugan, at kapaligiran laban sa WTE incinerator.
Ipinagpapatuloy ng mga komunidad sa Smokey Mountain ang kanilang karapatang mamuhay nang may dignidad, pangalagaan ang kalikasan, at panatilihin ang kanilang kabuhayan. Pinagtitibay ng Panaghiusa na ang tunay na solusyon sa basura at pagbaha ay dapat nakabatay sa paggalang sa karapatang pantao, pangangalaga sa kapaligiran, at pagpapatibay ng kabuhayan ng mga pamayanan. #
Comments