Isang taon pagkatapos ng di-makatarungang hatol, inilunsad ng Defend Talaingod 13 Network ang sign-on statement; Panaghiusa nananawagan na manindigan para sa mga Katutubo, advocates

[ENGLISH] A year after unjust conviction, Defend Talaingod 13 Network launches sign-on statement; Panaghiusa urges public to stand with IP, advocates

Bilang pagpapakita ng matibay na pagkakaisa at pagtutol, inilunsad ng Defend Talaingod 13 Network ang isang online sign-on statement na pinamagatang “Isang Taon Pagkatapos ng Di-makatarungang Hatol sa Talaingod 13,” upang gunitain ang unang anibersaryo ng kontrobersyal na hatol noong Hulyo 15, 2024 sa 13 tagapagtanggol ng karapatang pantao ng mga Katutubo at mga guro.

Larawan mula sa Kodao.

Ang pahayag, nakasulat sa Ingles at Tagalog, ay kumakalat ngayon sa iba't ibang digital na plataporma, nananawagan sa mga indibidwal at organisasyon na mariing kondenahin ang kriminalisasyon ng makataong pagkilos at igiit ang hustisya para sa Talaingod 13—kasama sina dating Bayan Muna Representative Ka Satur Ocampo, ACT Teachers Partylist Representative France Castro, walong boluntaryong guro mula sa Salugpungan Lumad School, at tatlong iba pa.

MAY KINALAMAN: Who are the Talaingod 13? And why is there a need to defend them? 

“Ang kasong ito ay halimbawa kung paano ginagamit ang batas upang parusahan ang mga sumusuporta sa mga Katutubo,” nakasaad sa pahayag. “Hindi krimen ang kanilang ginawa—ito ay katapangan at malasakit.”

Nanawagan ang Defend Talaingod 13 Network sa muling pagbubukas ng mga paaralang ito at sa pagtataguyod ng karapatan ng mga Katutubong kabataan sa edukasyon. Umapela rin ang online na kampanya sa Court of Appeals upang baligtarin ang hatol, at nananawagan sa Department of Education na kumilos nang makabuluhan para sa muling pagtatayo ng mga paaralang Lumad. Hinihingi rin nito ang pagtatapos sa kriminalisasyon ng mga tagapagtanggol ng karapatan, mga guro, at human rights workers.

Binibigyang-diin ng Panaghiusa Philippine Network to Uphold Indigenous Peoples’ Rights na ang online sign-on statement ay hindi lamang panawagan sa legal na hustisya—ito ay isang panawagan para sa aksyon ng publiko.

“Hindi kami mananahimik sa harap ng inhustisya,” ayon kay Rikki Mae Gono, National Coordinator ng Panaghiusa. “Ang hatol laban sa Talaingod 13 ay isang pag-atake sa lahat ng tagapagtanggol ng karapatan ng mga Katutubo. Matatag ang aming paninindigan: Depensahan ang mga tagapagtanggol ng karapatan,” dagdag niya.

Nananawagan ang Panaghiusa sa publiko—lalo na sa mga guro, mag-aaral, relihiyosong grupo, at mga tagapagtanggol mula sa civil society—na pumirma sa pahayag at manindigan laban sa kriminalisasyong patuloy na nararanasan ng mga Katutubo at advocates. Nakikita ng network ang kampanyang ito bilang bahagi ng mas malawak na kilusan para ipaglaban ang karapatan ng mga Katutubo sa kanilang lupang ninuno, sariling pagpapasya, at edukasyon.

Bukas sa publiko ang online sign-on statement at umani na ng suporta mula sa mga grassroots organizations, religious groups, akademiko, at mga human rights advocates sa Pilipinas at sa ibang bansa. Inaanyayahan ng Defend Talaingod 13 Network at Panaghiusa ang mas maraming indibidwal at institusyon na idagdag ang kanilang pangalan at palakasin ang panawagan para sa hustisya.

Pumirma na sa pahayag! Ipaglaban ang Talaingod 13!

Sanggunian:

Rikki Mae Gono

Pambansang Tagapag-ugnay

Panaghiusa Philippine Network to Uphold Indigenous Peoples’ Rights